باكوری‌ كوردستان : نه‌ورۆزی ئه‌مساڵ پاشه‌ڕۆژی كورد ده‌ستنیشان ده‌كات

هه‌ردو پارتی كوردی باكوری باكوری كوردستان (KCD) و (BDP) رایانگه‌یاند: نه‌ورۆزی ئه‌مساڵ پاشه‌ڕۆژی كورد ده‌ستنیشان ده‌كات و  به‌دروشمی (ئازادی‌ بۆ ئۆجه‌لان و پێگه‌ی سیاسی بۆ كورد) له‌ زیاتر له‌ (٤٥) ناوه‌ند ئاهه‌نگی نه‌ورۆز ئه‌نجامده‌ده‌ن.

 نەوا/ له‌ كۆنگره‌یه‌كی رۆژنامه‌وانیدا كه‌ بۆ هه‌ریه‌كه‌ ئه‌حمه‌د تورك و  ئایسه‌ڵ توغڵوك هاوسه‌رۆكانی‌ كۆنگره‌ی جڤاكی دیموكراتی (KCD) و سه‌ڵاحه‌دین ده‌میرتاش و گوڵته‌ن كشاناك هاوسه‌رۆكانی‌ پارتی ئاشتی و دیموكراتی (BDP) له‌ شاری ئامه‌د رێكخرابو، به‌رنامه‌ی نه‌ورۆزی ئه‌مساڵی باكوردی كوردستانیان ئاشكرا كرد.

 ئه‌حمه‌د تورك ده‌رباره‌ی‌ گرنگی‌ نه‌ورۆزی‌ ئه‌مساڵ رایگه‌یاند:‌ نه‌ورۆزی‌ ئه‌مساڵ به‌ دروشمی‌ (ئازادی‌ بۆ ئۆجه‌لان و پێگه‌ی سیاسی بۆ كورد) ئه‌نجام ده‌ده‌ن و نه‌ورۆزی‌ ئه‌مساڵ پاشه‌ڕۆژی‌ كورد ده‌ستنیشان ده‌كات.

 ئاماژه‌ی به‌وه‌شكرد؛ كورد بۆ داواكاری‌ پێگه‌ی‌ خۆی‌ و مافه‌ زه‌وتكراوه‌كانی‌ له‌ مه‌یدانه‌كان ده‌نگ و ئاوازه‌كانیان بڵند ده‌كه‌ن، ئه‌م نه‌رۆزه‌ ده‌بێت نه‌ورۆزی‌ چاره‌سه‌ری‌ ئازادی‌ و پێگه‌ی‌ گه‌لی‌ كورد.

 به‌پێی به‌رنامه‌كه‌ش له‌ (٤٢) شار و به‌گشتی‌ له‌ (١٣٠) ناوه‌ند ئاهه‌نگی‌ نه‌ورۆز ده‌گێڕن، بانگهێشی‌ هه‌زار و (٩٥٠) داموده‌زگای‌ نێونه‌ته‌وه‌یی‌ و كه‌سایه‌تی كراوه‌.

 هاوكات سه‌ڵاحه‌دین ده‌میرتاش ئاماژه‌ی به‌وه‌كرد؛ نه‌ورۆزی‌ ئه‌مساڵ ده‌بێته‌ هۆكارێك بۆ ئه‌وه‌ی‌ گه‌لی‌ كورد داخوازی‌ چاره‌سه‌ری‌ له‌ مه‌یدانه‌كان ده‌ربخه‌ن و پیرۆزباییه‌كانی‌ ئه‌مساڵ زۆر قه‌ره‌باڵغ و مه‌زن ده‌بێت نه‌رۆزی‌ ئه‌مساڵ ده‌بێته‌ نه‌ورۆزی‌ هه‌ره‌ مه‌زن.

 هه‌ر له‌و كۆنگره‌ رۆژنامه‌وانیه‌دا گوڵته‌ن كشاناك نه‌ورۆزی به‌‌ سه‌ره‌تای‌ قۆناغێكی‌ نوێ دانا و داوای له‌ گه‌لی‌ كورد و هه‌مو دۆستانی‌ كرد كه‌ به‌ جۆشه‌وه‌ نه‌ورۆز له‌ مه‌یدانه‌كاندا پیرۆز بكه‌ن.