سه‌رۆك كۆماری عێراق په‌یامێك ئاڕاسته‌ی گه‌لی عیراق ده‌كات

سه‌رۆك كۆمار پیرۆزبایی له‌عیراقییه‌كان ده‌كات به‌بۆنه‌ی رزگاركردنی شه‌نگال و هه‌روه‌ها ستایشی قاره‌مانێتی هێزی پێشمه‌رگه‌ش ده‌كات .

ده‌قی په‌یامه‌كه‌...

به‌ناوی په‌روه‌ردگاری به‌خشنده‌ و میهره‌بانه‌وه‌

 

ئه‌ی گه‌لی عیراقی مه‌زن

 

ســڵاوی خواتان لێ بێت

له‌سایه‌ی یه‌زدانی مه‌زنه‌وه‌  رۆژی هه‌ینی 13/11/ 2015  هێزه‌ قاره‌مانه‌كانی پێشمه‌رگه‌ قه‌زای شه‌نگالیان به‌ ته‌واوی له‌ چنگی داگیركاریی تاقمی داعشی تێرۆریست  رزگار كرد كه‌  خوا یار بێت له‌به‌رده‌م گه‌له‌كه‌مان  هه‌ر شكست و دۆڕاندن  به‌شی ده‌بێت له‌م قه‌زا ئازیزه‌شدا بۆ هه‌تایه‌  تۆوی نامێنێت.ئه‌وه‌تا هێزه‌كانی پێشمه‌رگه‌ دوای ئه‌وه‌ی گورزی كوشنده‌یان له‌ چه‌ته‌كانی داعش سره‌واند و زیانی زۆریان پێ گه‌یاند، ئێستا سه‌رتاسه‌ری شه‌نگالیان كۆنترۆڵ كردوه‌ .

به‌ بۆنه‌ی ئه‌م سه‌ركه‌وتنه‌ مه‌زنه‌وه‌ پیرۆزبایی  له‌ گه‌لی عیراقمان ده‌كه‌ین كه‌ یه‌ك هه‌ڵوێست به‌ گژ تیرۆردا ده‌چنه‌وه‌ .

هاوكات پیرۆزبایی له‌ به‌رێز سه‌رۆك مه‌سعود بارزانی و ته‌واوی سه‌ركرده‌ سیاسیی و فه‌رمانده‌ سه‌ربازییه‌كانی هه‌رێمی كوردستان ده‌كه‌ین  سوپاسی زۆریان ده‌كه‌ین له‌ پای رۆڵ  و خۆڕاگریی و قوربانیدانیان له‌ پێناوی تۆمار كردنی ئه‌م سه‌ركه‌وتنه‌ مێژوییه‌ كه‌ خۆی له‌ رزگار كردنی شنگال و گه‌ڕانه‌وه‌ی  خۆشی و شادی بۆ چیا سه‌ركه‌شه‌كه‌یدا ده‌بینێته‌وه‌ .

گه‌له‌كه‌مان  له‌مه‌ولا چاو خافڵ ناكات و  و شه‌ونخونی ده‌كات تا له‌ناوبردنی یه‌كجاره‌كیی داعش و تێرۆریسته‌كان له‌ هه‌ر بستێكی عێراقدا ، گه‌له‌كه‌مان به‌ شانازییه‌وه‌ ستایشی  قاره‌مانێتیی و قوربانیدانی هێزه‌ قاره‌مانه‌كانی پێشمه‌رگه‌  و رۆڵی هاوپه‌یمانیی نێوده‌وڵه‌تیی و هه‌مو ئه‌وانه‌ش ده‌كات كه‌ به‌شدارییان كردوه‌ له‌ به‌دیهێنانی ئه‌م سه‌ركه‌وتنه‌ یه‌كلایی كه‌ره‌وه‌یه‌دا  ، كه‌ پشت به‌ خوا مژده‌ی هه‌نگاو نان به‌ره‌و رزگاركردنی موسڵ و ته‌واوی پارێزگای نه‌ینه‌وای پێ یه‌ له‌ چنگی ئه‌م چه‌تانه‌ كه‌ وڵاتیان وێران و كاول كردوه‌ .

له‌ كاتێكدا سه‌ر نه‌وی ده‌كه‌ین بۆ ئه‌و شه‌هیده‌ قاره‌مانانه‌ی كه‌  گیانی خۆیان و ئازیزترین شتیان له‌ پێناوی ئه‌م سه‌ركه‌وتنه‌دا به‌خشی ، به‌ داخێكی زۆریشه‌وه‌ ئه‌و تاوانی كوشتن و بڕین و رفاندن و كاولكاریی و ده‌ربه‌ده‌رییانه‌ به‌ بیر دێنینه‌وه‌ كه‌ هه‌زاران هاوڵاتی ئێزدی و مه‌سیحیی و عێراقیییه‌كانی تر له‌سه‌ر ده‌ستی تاقمی داعشی تێرۆریست  به‌سه‌ریان هات و روبه‌ڕوی بونه‌وه‌ ، به‌ داخێكی زۆره‌وه‌ مه‌ینه‌تییه‌ سه‌خت و دژواره‌ مرۆییه‌كانیشیان  ده‌هێنینه‌وه‌ یادمان به‌ تایبه‌تیی ژن و كچه‌ رفێنراوه‌ ئیزدییه‌كان  له‌  كاتی به‌گژاچونه‌وه‌ی دڕنده‌یی داعشییدا به‌سه‌ریان هاتوه‌ .

 سڵاو ده‌نێرین بۆ قوربانیدان و  ئازایه‌تیی  جه‌نگاوه‌ره‌كان له‌ شنگال و ئه‌نبار كه‌ هێزه‌ هاوبه‌شه‌كانمان به‌ خۆڕاگریی و وره‌ی به‌رزه‌وه‌ له‌ پێشڕه‌ویدان بۆ  گه‌ڕاندنه‌وه‌ی  ژیانی ئاسایی له‌ وڵاتمان و ناوچه‌كه‌ و ، پاككردنه‌وه‌ی رومادیی له‌ پاشماوه‌كانی داعش و به‌دیهێنانی سه‌ركه‌وتنی به‌هێزی هێزه‌ هاوبه‌شه‌كانمان له‌ هه‌مو به‌ره‌كاندا به‌سه‌ر چه‌ته‌ تاوانباره‌كانی داعشدا  كه‌ له‌ هه‌موو پێودانگێكی ئاینی و ره‌وشتی داماڵراون.

 

فوئاد مه‌عسوم

سه‌رۆك كۆمار

13-11-2015"

 

Qadirzada.com © 2009 - 2015. All rights reserved