| ||
|
||
سەرکۆماری کورد و حکومەتێکی مەزهەبی دەقگرتو
مەهدی خالید خەمبار ئەزمونی نزیک بە ٨ ساڵ بۆ حیزبێک بەسە تا لەبەر ڕۆشناییدا هەڵسەنگاندن و بەخۆداچونەوەی تەواو بۆ خۆی بکات و تەتەڵەی لایەنە ئەرێنی و نەرێنیەکانی خۆی بکات و بشتوانێت پلانی داهاتوشی لەبەردا دابڕێژێت بەدرێژایی میژوی دور و درێژ و سەخت و پڕ قوربانی و دژواری ، لە هەردو قۆناخی خەباتی شار و شاخی ، بەقەد ئەم چەند ساڵەی دوایی یەکێتی ڕوبەڕوی قەیران و کێشەی گەورە و داکشان نەبۆتەوە بە بۆچونی زۆرێک لە خەڵک ، بەر لەو شەبەقەی کە گۆڕان لە هەیکەلی یەکێتیدا کردیەوە ، یەکێتی خودی خۆی هۆکاری گەورەی پشتی شکستەکانی خۆیەتی !! ؟ سەرکردایەتی سیاسی یەکێتی نیشتیمانی و بەتایبەت جەنابی مام جەلال بە وەرگرتنی پۆستی سەرکۆماری ( هەمو خەمی ئەو دۆڵەیان بارکرد لە کۆڵی یەکێتی ) ! عێراق لە ساتەوەختێکدا خۆی ڕادەستی سەرکۆمارێکی کورد کرد کە لێوان لێو بوو لە قەیرانی سیاسی ، ئابوری ، ئەمنی ، ئیداری ، قەزایی ، سەربازی ، کۆمەڵایەتی ، خزمەتگوزاری ، فەرهەنگی ، مەزهەبی و تایفی ، شیرازەی ژیانی پێکەوەیی تادەهات زیاتر تێکدەچو ، ئەم دۆخە ئاڵۆز و قەیراویە وایدەخواست یان دەبێت تاڵەبانی هەم خۆی و توانا کاریزماییەکەی ، هەمیش حیزبەکەی بخاتە ژێر بارێکی قورس و گران یان ئەوەتا ( ئەو تفەی کە ڕۆیکردوە هەڵیبگرێتەوە ) ! بە لایەکیتر وەرگرتنی ئەم پۆستە بو بە فاکتەرێکی گەورە تا بەهۆیەوە ووزە و تواناکانی مام جەلال داگیر و سەرقاڵ بکات و بۆشاییەکی ئێجگار کەم بهێڵێتەوە تا لەوێوە ئاگاداری ڕەوشی حیزبەکەی بێت. قەیرانەکان تا دەهات ، قوڵتر دەبونەوە ، عێراقی فیدرال و شەراکەتی نیشتیمانی و مادەی ١٤٠ ( بوبون بە مەرەکەبی سەرکاغز ) ! هەنگاوی گەورە بەئاراستەی دامەزراندنی دەسەڵاتێکی سەرسەختی مەزهەبی تاکڕەوانە دەنرا ! ئەم هەمو ڕوداو و ئەم دۆخە پڕجەنجاڵیە ، تاڵەبانیان بەجۆرێک خەریککردبو کە ئیتر نەدەپەرژایە سەر باس و خواس و جموجۆڵە نائاساییەکانی ناو حیزبەکەی . دوری سکرتێری گشتی چانسی زیاتری دا بەو کەسانەی کە کوتلەیان نەبوو تا دروستی بکەن و بەوانیتریش کە بونیان هەبو نشونما بکەن و بای باڵیان ڕابدەن ( کورد دەڵێ ئەگەر بابێت یا باران هەر لە بەفر کەمدەبێتەوە) واتە ئەم ڕاکێشڕآکێش و ململانێ قورس و مەترسیدارانە و سەرقاڵی سەرۆکی حیزب هەمویان بە زەرەری یەکێتی تەواو دەبن جیابونەوەی بزوتنەوەی گۆڕان بەشێک بوو لەو دەرەنجامە تاڵە ، بەڵام ئەمە دوا گورز نەبو بەر یەکێتی بکەوێ، ئەم جیابونەوەیەش نەیتوانی تینۆتی تەکەتول و باڵباڵێن بشکێنێت و بنبڕی بکات ، بەمەش جەماوەرێکی زۆری یەکێتی لە ( قاعیدە و کادیران ) ی ئاستە جیاجیاکان لە یەکێتی بە ئاشکرا و نهێنی ڕەنجان ، ( ڕێکخستنەکان بە ناوەندی دەرەوەش )، لەهەندێ ووڵات ( کۆمیتەی پارسەنگ ) دروستبوو ، دوچاری لێکترازان و توڕەیی بون و لەهەندێ ووڵاتیش ( کۆمیتەی پارسەنگ ) دروست کرا ( کۆمیتەی ٢ ی بەریتانیا ) بە نمونە ، بەری توڕەیی یەکێتیەکان لە هەڵبژاردنی پەڕلەمانی کوردستاندا یەکێتی چنیەوە و بەوەش یەکێتیەکان سزای حیزبەکەیاندا قۆناخی نەخۆشکەوتنی تاڵەبانی و دورکەوتنەوەی لە گۆڕەپانی سیاسی کوردستانی و عێراقی و هەرێمی و نێودەوڵەتی و خودی یەکێتیش ، بە قۆناخێکی هەستیار و کاریگەر هەژمار دەکرێت و ئەم دابڕانەی مام کاریگەری ڕاستەوخۆی دانا لە سەر کۆی مەسەلەکان و ئاستەکان . عێراق و کوردستان ڕوبەڕوی بارودۆخێکی سیاسی ، ئابوری نەخوازراو بونەوە و کێشەکانی نێوان هەرێم و بەغدا قوڵتر بونەوە، پرۆسەکانی ئاشتی خاووخلیچکیان تێکەوت لەم هەژانی غیابی تاڵەبانیەدا ، زەرەرمەندی یەکەم خودی یەکێتی و یەکێتیەکان بوو کە توشی جۆرێک لە شڵەژانی ( دەرونی و فیزیکی ) هات . چەقی بڕیار و بوێری لە بڕیاردان بەهۆی فرەمینبەریەوە توشی شکست هات ، ئەو حیساباتەی جاران بۆ سەنگ و پێگە و پیرۆزی یەکێتی دەکران کاڵ بونەوە ، بڕیاردان زۆر سەختبوو ، هەرکەسەو لێداوانی خۆی دەدات، دەوترێت ( سەرچاوەکە نەیویست ناوی ئاشکرا بکرێت ) هەمو ئەمانە وەک کرم داری یەکێتی زیاتر کرمۆڵ دەکەن ، هەمیشە سەوزێتی و گەشێتی ئەم دارەش بۆ (یەکێتیە یەکێتیەکان ) جیا لەوانەی دوای ( باڵباڵێنە و تەکەتول ) کەوتون زۆر گرینگ و پیرۆزە و ڕەنگە تا سەریش چاو لەم وەزعە نەپۆشن کە یەکێتی بەهۆیەوە دوچاری ئیفلیجی کراوە، ڕەنگە یەکێتیەکان نەتوانن سەبری ئەیوبیان هەبێت ! بەستنی کۆنگرە بە تاکە چارەسەردەزانن تا لەوێدا بڕیاری پێویست بدرێت و خاڵ بخرێتە سەر پیتەکان و یەکێتی بگەڕێندرێتەوە سەر سکەی جارانی پرسی وەرگرتنەوەی پۆستی سەرکۆمار بۆ خولێکیتر لە لایەن یەکێتیەوە ، جیا لە بەهەدەردانی توانای کەسایەتیەکی تری یەکێتی و دورخستنەوەی کاراکتەرێکیتر بترازێ ، لە سایەی ئەم حکومەت و ئەم سیستەمە تایفی و مەزهەبیەدا نە وەک یەکێتی و نە وەک گەلی کورد و هەرێمی کوردستان لێی سودمەندنابین بۆ ئەوەشی خەرمانی ئەو زیانانەی بەهۆی بونە سەرکۆماریەوە لە ٨ ساڵی ڕابردودا بەر یەکێتی کەوتون با چیتر بەرزتر نەبێتەوە ، هیوادارم یەکێتی دەست لەوەرگرتنی ئەم پۆستە هەڵبگرێت ) هەرچەندە هیوایەکە و لەمێژە زیندەچاڵکراوە
|
||
Qadirzada.com © 2009 - 2014. All rights reserved
|
||