شاری مەریوان مەترسی ژینگەی لەسەرە

چه‌ترپرێس -  محه‌مه‌د ئه‌مینی

دەشتی بێلوو که‌ یه‌کێکه‌ له‌ گه‌وره‌ترین سه‌یرانگاکانی شاری مه‌ریوانی رۆژهه‌ڵاتی کوردستان و ساڵانه‌ ژماره‌یه‌کی زۆر بۆ به‌سه‌ربردنی کاتێکی خۆش

 رووده‌که‌نه‌ ئه‌و شوێنه‌، مه‌ترسی له‌ ناوچوونی هه‌یه‌ و بڕیاروایه‌ بکرێته‌ ناوچه‌یه‌کی پیشه‌ سازی.

ئەم شارۆچکەیە کە لە لایەن به‌ڕێوبه‌رایه‌تی پیشه‌سازی و سه‌رچاوه‌سروشتیه‌کانه‌وه‌ دروست ئەکرێت زەوییەکەی'٢٠٠'دۆنمه‌ کە زۆرێک دارو دەوەنی بەر

 کەوتوەو لە ڕیشەیان دەرهێناوە. بۆ ماوەی زیاتر لە '٤٠' رۆژه‌ کۆمپانیایه‌کی به‌ڵێنده‌ر تیایدا کارده‌کات و بوەتە هۆی خەسارێکی زۆری ژینگەیی.

بەڕێوەبەرانی ئەم پرۆژە لە ئیدارەی سەرچاوە سروشتییەکان مۆڵه‌تی تایبەتیان وەرگرتوە بەڵام ئیدارەی ژینگەی مەریوان و هەروەها ئیدارەی ژینگەی

ناوەندیی پارێزگا ناڕەزایەتی خۆیان بۆ ئەم مەسەلەیە دەربڕیوە.

شایانی باسە خەڵکی ئاوایی بێلوو لە سەر جێبەجێ کردنی ئەم پرۆژە ناڕازین چونکە لەوەڕگەی ئاژەڵەکانییان ئەفەوتێ و مێرگیان نامێنێت. هەر بەو بۆنەوە

چەن جارێک بوونەتە ڕێگر لە بەڕێوە چوونی کارەکەو بڕیاریش وایە بە کۆ کردنەوەی ئیمزاو وەک تۆمارێک پێش بە بەڕێوە چوونی بگرن.

دروست کردنی ئەو شارۆچکە پیشەییە ئەبێتە هۆی خەسارگەلێک زۆری ژینگەیی بە شێوەیەک کە دواتر قه‌ره‌بوو نابێتەوە، ئەمە لە کاتێکدایە کە بوونی

 سروشتی دەس لێنەدراو ئەبێتە هۆی ڕاکێشانی گەشتیار بۆ ناوچەکە.

جێگای ئاماژه‌یه‌ شاری مه‌ریوان یه‌کێکه‌ له‌ شاره‌ گه‌شتیاریه‌کانی کوردستان و به‌ ده‌ریاچه‌ی زرێبار و دارستان و سه‌یرانگاکانی ناوبانگی په‌یدا کردوه‌ و

 ساڵانه‌ به‌ هه‌زاران که‌س له‌ رۆژهه‌ڵاتی کورستان و ئێران و وڵاتانی ده‌ره‌وه‌ سه‌ردانی ئه‌م شاره‌ ده‌که‌ن، به‌ڵام له‌م ساڵانه‌ی دواییدا وه‌ک چالاکانی

 ژینگه‌پارێزی ئه‌م شاره‌ باسی لێوه‌ ده‌که‌ن به‌ هه‌زاران دۆنم له‌ دارستان و باخه‌کانی بووه‌ته‌ قوربانی ئاگرکه‌وتنه‌وه‌ و زیانێکی زۆریان به‌رکه‌وتوه‌.

ده‌ریاچه‌ی زرێباریش که‌ به‌ هۆی که‌مته‌رخه‌می و پشتگوێ خستنی به‌رپرسانی حکومی به‌ڕێوبه‌رایه‌تی ژینگه‌ی ئه‌و شاره‌وه‌ چه‌ندین ساڵه‌ قه‌وزه‌ و لیته‌ی ناو

 ئاوی ئه‌و ده‌ریاچه‌یه‌ خاوێن نه‌کراوه‌ته‌وه‌ و به‌ پێی وته‌ی شاره‌زایانی ژینگه‌پارێزی رووبه‌رووی مه‌ترسی وشکبوون بووه‌ته‌وه‌.

له‌ ماوه‌ی ئه‌م ساڵدا کۆمه‌ڵێک له‌ گه‌نجانی ئه‌و شاره‌ که‌ به‌شێوه‌یه‌کی خۆبه‌خشانه‌ و له‌ چوارچێوه‌ی رێکخراوێکی ناحکومی به‌ ناوی "ئه‌نجومه‌نی سه‌وزی

 چیا" له‌ پێناو وشیارکردنه‌وه‌ی خه‌ڵک و پاراستنی ژینگه‌ له‌ سه‌ر ئه‌رکی خۆیان به‌ هانای دارستانه‌ سوتاوه‌کانه‌وه‌ ده‌چوون، له‌ لایه‌ن به‌رپرسانی ئاسایشی ئه‌و

 وڵاته‌ به‌ تۆمه‌تی بێ بنێما ده‌ستبه‌سه‌ر و ره‌وانه‌ی گرتووخانه‌ کراون و سزای قورسیان به‌سه‌ردا سه‌پێندراوه‌.

 

وێنه‌یه‌ک له‌ سروشتی مه‌ریوان و ده‌ریاچه‌که‌ی


وێنه‌یه‌ک له چالاکییه‌کانی ژینگه‌پارێزی له‌ کاتی کوژاندنه‌وه‌ی ئاگری دارستانه‌کاندا