شاندێک له‌ قه‌ندیله‌وه‌ به‌ره‌و په‌رله‌مانی هه‌رێم به‌ڕێکه‌وتن

به‌ ئامانجی ئاگادارکردنه‌وه‌ی په‌رله‌مانی هه‌رێمی باشوری کوردستان له‌ زیانی هێرشه‌کانی سوپای تورک له‌سه‌ر ناوچه‌کانی بناری قه‌ندیل و گه‌یاندنی بانگه‌وازی راگرتنی هێرشه‌کان، شاندێک له‌ بناری قه‌ندیله‌وه‌ به‌ره‌و په‌رله‌مانی هه‌رێمی باشوری کوردستان به‌ڕێکه‌وتن .

بەپێی هەواڵیکی فورات نیوز شاندێکی (٥) که‌سی پێکهاتوو له‌ خه‌ڵکی گونده‌کانی بناری قه‌ندیل، وه‌کو نوێنه‌ری سه‌رجه‌م دانیشتوانی ناوچه‌که‌، ئه‌مڕٍۆ ده‌گه‌نه‌ شاری هه‌ولێر و سه‌ردانی په‌رله‌مانی هه‌رێمی باشوری کوردستان ده‌که‌ن .

شانده‌که‌ که‌ له‌ نوێنه‌ری شاره‌وانی و مامۆستا و که‌سانی ناسراوی ناوچه‌که‌ پێکهاتوون، له‌و سه‌ردانه‌یدا یاداشتێکی تایبه‌ت که‌ پێکهاتووه‌ له‌ نوسراو، دیمه‌ن و وێنه‌ی بۆردومان و زیانه‌کانی هێرشه‌کانی فڕۆکه‌ جه‌نگییه‌کانی سوپای تورک بۆسه‌ر هه‌رێمه‌کانی قه‌ندیل راده‌ستی په‌رله‌مانی هه‌رێمی باشوری کوردستان ده‌کات .

سه‌باره‌ت به‌ ناوه‌رۆکی یاداشته‌که‌ هیچ زانیارییه‌ک به‌ده‌ست نه‌خرا، به‌ڵام راگه‌یه‌ندرا که‌ ئاماری گشتی سه‌رجه‌م هێرشه‌کان ئاماده‌ کراوه‌ و له‌و یاداشته‌دا داوای راگرتنی هێرشه‌کانی سه‌ر ناوچه‌که‌ راده‌ستی په‌رله‌مانی هه‌رێمی باشوری کوردستان ده‌کرێت .

شانده‌که‌ پێکهاتووه‌ له‌ :

 شێخ عومه‌ر ( سه‌رۆکی شاره‌وانی بناری قه‌ندیل )

 مامۆستا عه‌بدولڕه‌حمان ( به‌ڕێوه‌به‌ری خوێندنگای گوندی ئێنزێ )

 کوێخا قادر ( له‌ هێرشه‌کانی رابردوودا ماڵ و خانووی خاپور کرابوو )

 مام شیر و که‌سێکی تریش به‌ناوی که‌ریم

جێگای ئاماژه‌ پێکردنه‌ تا ئێستا روون نییه‌ که‌وا په‌رله‌مانی هه‌رێم ده‌رگای خۆی له‌و شانده‌ ده‌کاته‌وه‌، به‌ڵام راگه‌یه‌ندرا که‌ شانده‌که‌ سوورن له‌ گه‌یشتن به‌ ئامانج .