ڕاگەیەندراوێك لەهاوپه‌یمانى دیموكراسى و دادپه‌روه‌رى

هاوپه‌یمانى دیموكراسى و دادپه‌روه‌رى، راگه‌یه‌ندراوێكى له‌سه‌ر رووداوه‌كانى كۆیه‌ بڵاوكرده‌وه‌و رایده‌گه‌یه‌نێت، خوازیاری ئەوەن رەوشی هەرێمی كوردستان توشی ئاڵۆزی نەكرێت و ناوچەكانی هەرێم نەكرێتە شوێنی ململانێ و یەكلاکردنەوەی گرفتە دەرەكییەكان.

ده‌قى راگه‌یه‌ندراوه‌كه‌:

راگەیەنراوێك لە هاوپەیمانی دیموکراسی و دادپەروەرییەوە

‎ئەمڕۆ بارەگاكانی هەردوو حیزبی دیموكراتی ئێران (حدكا) و حیزبی دیموكراتی كوردستان (حدك) لە كۆیە لەلایەن هێزەكانی كۆماری ئیسلامیی ئێرانەوە بۆمباران كران، لە ئەنجامی ئەو بۆردومانەدا چەندین قوربانی لێكەوتەوە.

‎ئەم رووداوە لەكاتێكدایە كە ناوچە سنورییەكانی هەرێم چەند رۆژێكە لەلایەن ئێران و تورکیاوە بۆردومان دەكرێن.

‎وێڕای نیگەرانی لە بۆردومانكردنی كۆیەو ناوچە سنورییەكان، جەخت دەکەینەوە کە ناکرێ خاکی هەرێم ببێتە سەرچاوەی هەڕەشە بۆ ئەمنیەتی دراوسێکان، ئێمە هه موو جۆرە توندوتیژی و شەڕێك مەحکوم دەکەین و خوازیاری ئەوەین رەوشی هەرێمی كوردستان توشی ئاڵۆزی نەكرێت و ناوچەكانی هەرێم نەكرێتە شوێنی ململانێ و یەكلاکردنەوەی گرفتە دەرەكییەكان، بۆیە داوا لە هەموو لایەك دەكەین ئارامی ناوچەكە بپارێزن و هیچ بەهانەیەك نەهێڵنەوە بۆ دروستكردنی بارگرژی و  دەستێوەردان.

‎هەروەها داوا لە لایەنە پەیوەندیدارەكان و حكومەتی هەرێم دەكەین پەلەبكەن لەوەی بەدەم گرفتەكەوە بچن و رێگری بكەن لە دووبارەبونەوەی رووداوی لەو چەشنە.

‎سەرەخۆشی لە كەسوكاری قوربانیەكان دەكەین و هیوادارین بریندارەكان خوا زوو شفایان بۆبنێرێت.

‎ووتەبێژی هاوپەیمانی دیموکراسی و دادپەروەری