پیاوێک لە باران

 

(‌‌پێشکەشە بە قەڵەمەکەی شێرکۆ بێکەس )ی شاعیر...

‌پیاوێک لە باران ئەچێت و

‌خۆی دەکات بەملوانکەی شەونمی

‌هەموو درەختێکی شار و لادێ و تەنانەت خشپە و چرپەی

‌کۆڵانانی ووڵاتەکەم ،،

‌پیاوێک بۆتە پەلکە زێڕینەی حەوت ڕەنگی بەخشندەیی و

‌خۆی بەکەم ئەزانێ ،

‌پیاوێک هەمیشە لە شانەی هەنگوین ئەچێت و خۆی هەنگ نی یە ،

‌پیاوێک وەکو ئاسکی گەرمیان ئازایە و

‌کوڵاوە جوانەکەی مامەڕیشەی لەسەرە و جامانەکەی نوێژی شۆڕشی پێدەکات فەخر بە بارینی ئەوینی ماچی خۆر ئەکات،

‌پیاوێک لەسەر گوێسەبانەی هەموو ماڵێکە و بەیانی و نیوەڕۆ و عەسر و ئێواران و شەوان فێری ئەستێرەی ڕاستگۆیمان ئەکات ،

‌پیاوێک خۆی ،، هەر خۆی چەکوشەکەی

‌کاوەی ئاسنگەری پێ یە و

‌بە (گوللە ووشەکان)ی

‌تاغووت لەناو ئەبات و

‌فەرهەنگۆکی ڕووباری خۆش بەختی لە مستیایەتی ؛

‌پیاوێک هەزار و دوو ئەوەندەی تر و

‌سەت ئەوەندەی تر و زۆری تر

‌زەوی ژمارە یەک بێت و سفرەکانی درێژ درێژ بێت

‌تاکو ماڵی خۆر ؛ ئاوا زیرەکە .

‌پیاوێک لەپشت بەردە قارەماندا جەنگی کردووە و لەگەڵ خولە پیزەدا نانی خواردووە و

‌لەگەڵ مەشخەڵانی شۆڕشی نوێدا یەکەم قەسیدەی نوسیوە ،

‌لەباوەشی دایکی ماندوو نەناسدا گەورە بووە و

‌لە نێرگزی گۆیژە و گوڵاڵە سوورەی ئەزمەڕدا پێکی لێکدانەوەی نۆشیوە ،

‌زۆر جار لەگەڵ حەپسەخانی نەقیب و هێرۆی ئیبراهیم ئەحمەد و لەیلا قاسم و مەهاباد قەرەداغی و  ساکینەدا لە2013/01/09 لە پاریس گڵۆپەکانی شاری شکاندووە ،

‌پیاوێک زۆر لەوەی کە باسی دەکەن لە جەنگی جیهانی یەکەم و دووەمدا پاڵەوان بووە ئەم خۆیەتی بەکڵاوێکی سادەی پڕ لە بەهای یەکسانی و

‌ووشە داهێنان و ڕەمزی شیعر و ئاوێنەی واقیعی و

‌دەستی کردۆتە ملی ئاسکە گەریلا ئاڵتوونی یەکان ،

‌پیاوێک سێبەری وا لە کراسی مانگ و

‌لەبەردی ئەهرامەکان و

لە ئیمپراتۆری شوورای سین ،

‌هەردەم دەجەنگێ ، ئای کە دەجەنگێ

‌باکوور و باشووری بۆنی یە ،

‌خەونی لە ڕۆژ هەڵاتە و ڕۆژئاواش هەر موڵکی باوکێتی ،

‌پیاوێک لەمەزنایەتیدا لە ئەفسانەی ئۆدیسە و کلیلە و دمنە دەچێت ،

‌پیاوێک (دایکی و نیشتمانی) لەسەر شانی ڕاست و چەپە و هەرگیز لەبیابانی

‌خیانەتکاریدا تێنەپەڕیوە ،

‌گەنمی لە ئاشی نامەردا و

‌قۆچەقانێ ی بێناموسی و

شەڕواڵی لەزەتی بێڕەوشتی و چاوداگرتنی لە چاوی کیژێکی ناو شیعری ناشیرینیش دانەگرتووە و

بە شەقامی وێرانی دەستی زۆردار تێنەپەڕیوە ،

‌دۆلکەی لە کانی نەوتی هیچ پاشایەک پڕ نەکردووە ،

‌پیاوێک ئەو خۆی نابینێت و کەچی ئێمە لەناو هەموو هەناسە شیعری یەکانی ئەوداین بێ مەودا ،

‌ئەو خۆی لەماڵی تەنیایدا دەژی و

‌ئێمەشی سواری شاری شەمەندە نەفەری حەقیقەت کردووە

‌ئەو هەر زیندووە ، لە ماڵی شیعرەکانی

‌ئاسۆ و دڵ و خاک و ئاوی ووڵات .

‌ئەو ووشە لێی بێزار دەبێت و

ئەم  لەووشە بێزار نابێ ، دێڕەکانی

‌درێژ درێژ وەکو پرچی ئایشە و فاتمە .

‌پیاوێک ووشەکانی زێڕە خۆی لەگەوهەر ئەچێت ئەوە شێرکۆ بێکەسە ،

‌پیاوە ڕووباری یەکە چونکە هەر کە قەڵەمەکەی دا بەماڵی پەڕاوی ووشەدا

‌ئیتر ڕووبارێک مرەکەبی بەوویژدان دێنە خزمەت ماڵی کتێنخانەکەی ،

‌کەپڕە لە قاموسی بەویژدان بۆ گەلەکەی...

‌......      ......      ......

‌ڕێبوار ئالانی

‌بەریتانیا

****پێشکەشە بە قەڵەمەکەی (شێرکۆ بێکەس)ی شاعیر

Qadirzada.com © 2009-2022. All rights reserved