كاڵ مەبەرەوە ...

سەڵاح قابیل

كاڵ مەبەرەوە بالەخەیاڵ نەچیت .

هێشتان لەسوباتی خەما

هەڵنەساوم و بەكەناری

خۆشی نەگەیشتووم

هێشتان وەستاوم و

هەنگاوێكم نەگەڕاندۆتەوە

تاوەك پشت

لەڕێگای غوربەت بكەم .

لەفێڵبازێك ناچیت

قاوەی بەخت بخوێنێتەوە و

بەپاداشتێك جێم بهێڵی و

كاڵ بێتەوە .

لەفنجانێكدا جێم نابێتەوە

تابزانی من كێم

دەست بەوشەكانما بگرە و

بەپەیژەی شیعرەكانما سەركەوە و

لەكۆتاییەوە عیشقەكان ببینە

چییان بەسەر دێت

فریای كاروانەكەم كەوە

بابە(مەحوی و نالی و قانعت )

بناسێنم .

ساڵانی تەمەنت

بەئاواتێك ئاشنات ناكا

چاوەڕوانی ئۆخەیەك مەبە

ئەو ئۆخەیە لەڕێبازی ئادەمەوە

تائێستا پێی نەگەیشتوون.

ئەتەوێ بەساوێلكەیی لەپەڕەكانی

(عبدالكریم مودەریس )تێبگەی

كاڵ مەبەرەوە .

بائەو گۆشەیەت پێ نیشان دەم .

ساوێلكە بووم ..

ساوێلكە بووم منیش بەخوا كەریمە

چاوەڕوانی سبەیم ئەكرد

چاوەڕوان مەبە خواوەندیش

بێ كردار پاداشتێكت پێ ببخشێ.

گوزەشت كوانێ

خۆ منداڵ بووین

دایك و باوكمان

بەپاڵەوانی قسمەت ئەزانی.

هەموو داوایەكمان لەوان ئەكرد

جەژنەكان

چاوەڕوانی جەژنانەیان بووین و

كەتوشی خەمێكش ئەبووین

هانامان بۆیان ئەبرد.

ئێستا دەركەوت

كەئەوانیش بۆ داواكانیان

سوجدە بۆ خالق ئەبەن .

كاتێ منداڵ بووین ؟

ئەوان هیچ نەبوون

لەوە زیاتر كە ویستەكانی ئێمەیان

ڕەوانەی ئاسمان ئەكرد و

خواوەند بزەییەك بەئێمە و

دەرفەتێكی حەسەنەی

بەئەوان ئەبەخشی .

ئێستا ئەوان وەك ئێمە و

ئێمەش وەك ئەوان

بەكۆمەڵ لەمزگەوتێكدا

سوجدە بۆ یەزداد ئەبەین

بەڵێ وا بو ئێستاش وەها .

ئەوەی (حەوای) بەگوناه ناسان

بەدۆست مەزانە و

مەهێڵە لەڕاستیت بگا

كاڵ مەبەرەوە .

ئەو عیشقەی بەر دەستی ئەخەم

هەر خواوەند دروستی كردووە

بەگومان مەبە  لەو حەڵاڵەی

ئەم شەماڵەی فەلەك بۆتی هێناوە

كاڵ مەبەرەوە لەئەمرۆمدا و

بێ خەم مەبە لەجێهێشتنم

وەرە و لەژێر چەتری ئیمان

بالەتۆیا خۆم بدۆزمەوە .......

 

Qadirzada.com ©2009 - 2022. All rights reserved