(( ڤالانتاین))

له‌م وڵاتی وشكه‌ ساڵه‌ و

دڕكستانه‌ .

ڤالانتاین بوونی نییه‌ ..

عه‌شق بڤه‌یه‌و

ژوان مه‌رگه‌ ،

ماچ ...

كوشتن و دابڕانه‌ .

چیت پێشكه‌ش كه‌م ..

خه‌ناوكه‌ی گوڵ .

رستێك وشه‌ی گوماناوی ،

شیعرێكی ژاكاو له‌خوێنا .

ئێمه‌ نه‌بووین ..

هه‌رچی خودا پێی ناخۆشه‌ ،

به‌سه‌ر ( دوعامانا ) .. هێنا .

گوڵم داوای چیم لێده‌كه‌ی ..

بۆ یادی ڤالانتاین و

بیره‌وه‌ری ئه‌وینداران .

ناترسی له‌رقی ره‌قیب

لێشاوی مه‌رگ و به‌ردباران .

له‌گه‌ڵ ئه‌وه‌ش ..

فه‌رموو ئه‌م شیعره‌م چنیوه‌ .

به‌بای شه‌وا بۆت ده‌نێرم ..

وشه‌كانی سوورو ئاڵن .

وه‌كوو كوڵمت .

ناونیشانی ..

پاك و بێگه‌ردو ناسكه‌ ،

چه‌شنی ناخ وجوانی دڵت .

بۆم نووسیوی ..

خۆشم ده‌وێی ..

وه‌كوو دز ،

رۆژێك دێم بۆ لات .

چونكه‌ له‌ده‌ڤه‌ری ئێمه‌ ..

له‌بری ماچ ،

گولله‌ت بۆ ده‌كه‌ن به‌خه‌ڵات .

خۆشه‌ویستی له‌م خاكه‌دا ..

قه‌ده‌غه‌و

پیس و تاوانه‌ .

نیشتمانم ..

دورگه‌ی كوشتن و

تاڵانه‌ .

هه‌موو شتێك ئاوه‌ژووه‌ ..

پێچه‌وانه‌ی مرۆڤ دۆستی و

ویستی پیرۆزیی و یه‌زدانه‌ .

بۆیه‌ به‌ترس و له‌رزه‌وه‌ ..

له‌دووره‌وه‌ ..

ده‌ڵێم .. عه‌شق و

یادی ڤالانتاینت باش .

ئه‌م شیعره‌شم ،

بۆتۆ ده‌كه‌م به‌جه‌ژنانه‌ .

ستار ئه‌حمه‌د