په‌رله‌مانی سویسرا ده‌نگی بۆ ناساندنی هه‌له‌بجه‌ و ئه‌نفال به‌ جینۆساید نه‌دا

دوای‌ ئه‌وه‌ی‌ به‌مه‌به‌ستی ناساندن رێكخراوی چاودێری‌ كوردۆساید دۆسیه‌یه‌كی سه‌باره‌ت به‌ ئه‌نفال‌و هه‌ڵه‌بجه‌ پێشكه‌شی پارله‌مانی سویسرا كرد، زۆرینه‌ی‌ ده‌نگی پارله‌مانی‌ ئه‌ووڵاته‌ دانی به‌ناساندنی كه‌یسه‌كاندا نه‌نا، تا ئه‌وكاته‌ی‌ له‌لایه‌ن دادگایه‌كه‌وه‌ ده‌ناسرێت.

پاش ئه‌وه‌‌ی له‌ 11ی ئازاری 2010، به‌شی په‌یوه‌ندییه‌ بیانییه‌کانی ڕێکخراوی چاودێری کوردۆساید – چاک، دۆسییه‌یه‌کی ئاماده‌کراوی، سه‌باره‌ت به‌ ناساندنی کاره‌ساته‌کانی هه‌له‌بجه‌و ئه‌نفال به‌ ژینۆساید بۆ کۆمسیۆنی ده‌ره‌وه‌ی په‌رله‌مانی سویسرا نارد، له‌ 31 ئۆکتۆبه‌ری هه‌مان ساڵدا ده‌نگیان له‌سه‌رداو ره‌وانه‌ی ئه‌نجومه‌نی پیران (ئه‌نجومه‌نی نوێنه‌رانی کانتۆنه‌کان)یان کرد، پاش تێپه‌رینی ساڵێک به‌سه‌ر دۆسیه‌که‌دا، له‌ 16ی دیسه‌مبه‌ری 2010 ئه‌نجومه‌نی پیران ده‌نگیان له‌سه‌ر دا، ئینجا له‌ 31ی ئۆکتۆبه‌ری 2011 کۆمسیۆنی کاروباری ده‌ره‌وه‌ی په‌رله‌مان خستیانه‌ ده‌نگدانه‌وه‌و به‌رزیانکرده‌وه‌ بۆ دانیشتنی گشتی (ئه‌نجومه‌نی گشتی) بۆ ده‌نگدان له‌سه‌ری.

رۆژی23/12/2011 واته‌ پێش نزیکه‌ی دوو هه‌فته‌ له‌مه‌وبه‌ر، په‌رله‌مانی سویسرا له‌ دانیشتنی سیانزه‌هه‌مینی گشتیی خۆیدا، به‌ پێی راپۆرتی ژماره‌ ( APK-SR 21.10.10) گفتوگۆی ته‌واوی له‌سه‌ر کردو خستیانه‌ ده‌نگدانه‌وه‌، له‌ ئه‌نجامدا 51 ده‌نگ به‌ به‌ڵێ‌و 106 ده‌نگ به‌ نه‌خێر ده‌نگیان دا.

سکرتاریه‌تی په‌رله‌‌مانی سویسرا له‌ نامه‌یه‌کی ره‌سمی خۆیدا که‌ بۆ به‌رپرسی به‌شی په‌‌یوه‌ندییه‌ بیانییه‌کانی‌ رێكخراوی كوردۆسایدا (هیوا ناسیح)یان ناردوه‌، ئه‌م ئه‌نجامه‌یان پێ راگه‌یاندوه‌. له‌ نامه‌که‌شدا که‌ پێنج لاپه‌ره‌یه‌، هاتوه‌: ده‌نگدان به‌ نه‌خێر له‌سه‌ر كه‌یسه‌كه‌‌، به‌مانای ئینکارکردن یان نه‌ناساندنی ئه‌و تاوانه‌ به‌ ژینۆساید ناگه‌یه‌نێت، به‌ڵکو ته‌‌نها مه‌به‌ست لێی ئه‌وه‌یه‌‌، که‌ ئه‌و دۆسییه‌یه‌ بابه‌تێکی قه‌زایییه‌ و پێویسته‌ پێش ده‌نگدانیان له‌سه‌ری له‌ لایه‌ن دادگایه‌کی نێوده‌وڵه‌تی، یان ئه‌م وڵاته‌وه‌ به‌ فه‌رمی ئه‌و تاوانانه‌ بناسرێت.

شایه‌نی باسه‌‌ ئه‌مه‌ یه‌که‌مجاره‌ له‌ مێژووی کوردا،‌ په‌رله‌مانی سویسرا ده‌نگ له‌سه‌ر دۆسییه‌یه‌کی‌ کێشه‌ی کورد بدات.  

هه‌ر له‌ باره‌ی ئه‌و دۆسییه‌وه‌، هیوا ناسیح به‌رپرسی گشتی په‌یوه‌ندییه‌کانی چاودێری کوردۆساید، به‌ سایتی ئاوێنه‌ی راگه‌یاند: راسته‌ که‌ ئه‌نجامه‌که‌ی زۆر دڵخۆشکه‌رنییه‌، به‌ڵام به‌ گشتی شتێکی زۆر پۆزه‌تیڤه‌و جێگه‌ی شانازییه‌، بۆ یه‌که‌م جار یشه‌رێکخراوی چاودێری کوردۆساید ئه‌م دۆسییه‌ی گه‌یانده‌ نێو هۆڵی گشتی
په‌رله‌مانی سویسراو ئێستا سه‌رجه‌م په‌رله‌مانتارانی ئه‌م وڵاته‌، ده‌زانن که‌ ئه‌نفال و هه‌ڵه‌بجه‌ چییه‌، وه‌ ئێمه‌ش له‌ هه‌وڵه‌کانمان به‌رده‌وام بین و کۆڵ ناده‌ین.

سه‌باره‌ت به‌هه‌نگاوه‌كانی داهاتووشیان، هیواوتی: هه‌نگاوی داهاتومان هه‌وڵی ناردنی دۆسییه‌که‌یه‌ بۆ دادگای باڵای سویسرا، یان دادگایه‌کی نێوده‌وڵه‌تی، پاشان جارێکی تر به‌ فه‌رمی داوا له‌ په‌رله‌مانی ئه‌م وڵاته‌ ده‌که‌ینه‌وه‌، که‌ ده‌نگدانی له‌سه‌ر بکه‌نه‌وه‌.

جێی وه‌بیرهێنانه‌وه‌یه‌، كه‌ کۆمه‌ڵکوژی ئه‌رمه‌نییه‌کان كه‌ ئه‌ویش كه‌یسێكی هاوشێوه‌ی‌ ئه‌نقاله‌، ساڵی 2001  له‌ سویسراخرایه‌ ده‌نگدانه‌وه‌و زۆرینه‌ی په‌رله‌مانتارانی سویسرا به‌ نه‌خێر ده‌نگیاندا، ئه‌وه‌ بوو پاش پێنج شه‌ش ساڵ دوای ئه‌وه‌ جارێکی تر خستیانه‌وه‌ ده‌نگدانه‌وه‌ و زۆرینه‌ به‌ به‌ڵێ ده‌نگیان بۆی دا.

ئاوێنە