ئای چەند کۆشام و چەند ماندوو و چەند ڕەنج بە خەسار




	لاپه‌ڕه‌ی سه‌ره‌تا


	وه‌ره‌ ئه‌م شه‌و پێکی ماچت لە سەر لێوەکانم دانێ و بە برژانگی چاوت سۆڵای ئەشکم بسڕەوە و پرچی ئاڵۆزکاوم لە سەر سنگت پرێشان کە و، بە شانەی پەنجەکانت دای بەهێنێ، لە ئامێزی پڕ سۆزت بە چیرۆکی هەزار و یەک شەوی حەسرەت بم خەوێنێ ، من دەروێشی تەکیەیی عەشقم وەرە بۆ خانقای تەنیایم ، دەفی زیکرم بۆ لێبدە تا پرچم سەماگێڕی ئەوینت بێ، وەرە ئەمشەو لە خەڵوەتی تەنیایی دەرم بێنە روناکی چرای چاوتم بۆ بهنێنە، وەرە بە تیشک و دەنگ با وەرزی ئاوێزان بون و شەوی سور و چرکەی سور تەپەڕ نبێت ، نوێژ بۆ تێکەڵ بونی ڕۆح بەکەێن ڕوت بینەوە لە نێو شەپۆلی گوناهدا لە برانبر جەهەنەمدا، وەرە تا دەرفەتە و نە سوتاوین ، تۆ نازانی لە پێدەشتە ڕەشەکانی خوا ئیمە بێ ڕوت بونەوێش گوناهبارین ؟ ئیمە پیادەین و بەهشت سوار دڵنیابە هەرچەند خێرایش بڕۆین پیناگێن ئای چەند کۆشام و چەند ماندوو و چەند ڕەنج بە خەسار ئای چەند کۆشام و چەند ماندوو و چەند ڕەنج بە خەسار، چەند ئەژنۆ بێ هێز و دڵ شەوەزەنگ و چاو بە فرمێسک، چەند گۆزەی هیوا شکاو و کۆشکی ئامانج ڕوخاو و ئارەزو بەجێماو، چەند شەوی تەنیاو ناخی ئاڵۆز و هەناسەی سارد، ، چەند ڕۆژی لێڵ چەند ژووانی چۆڵ و چەند چاوەڕوانی، ئای ل کاتژمێری وستاوی بەختەوەری و ماڵی بێ ورینگە و خەمیژگەی ژینی تاڵ، ئای لە سڵاوی تافتافی تەمەنێک کە ئەبخشرێ بە ماڵئاوی ئەوینیكی تەمەن کورت ، لە نەخشاندنی خەیاڵ لە ناخدا و لە هەزاران ئازاری پەنگ خواردە لە سنگدا ، لێوم بۆنی ماچی لێدێت، چەند بێزارم لە پایزی ماچەکان لە دەرختی ڕوتەڵانەی خەونەکان ، لە دەست و وسانبونی گردوون، سانا نیە جیا بونەوە لە خەمەکان ، سانا نیە دوور کەوتنەوە لە ئاگری ئازارەکان، سانا نیە کۆکردنەوەی سواڵتی گۆزەی شکاوی هیواکان، نا سانا نیە گوێ گرتن لە ئاوازی لە یەک دابڕان . چەند بێزارم لە بەهشتی خودا و چەرخی دەوران . چەند بێزارم لە یاسای بێ سەر و بنی پیرە جیهان، لە کەوکەبی بێ ئەختەر . لە ژیانێکی غەریبی نا ئاشنا و نا شناس ، چەند زەحمەتە گوزەر کردن بە کۆڵانی جودایی و چەند دژوارە شەم بسوتێ لە پێش دەمی زریان و ڕەشەبا، لەوەتی هەم خەم میوانمە و ماتەمیش ڕەنگی وینەم ئێوارانیشم تەم داگرتو، شادیش لە من یاخی و هەمو شەوێک ئەستێریشم بە تروسکەی ژان ئەپشکوێت، خو تەمەن یەک قەدەرە و میوەی تەمەن یەک وەرزە، لە هەڵگرتنی گابەرد گابەرد زام و ژان و ماندوو بون و ڕشتنی ئەم هەمو ئەشکە و سۆڵاوی چاو ، چیم بە دەست هێنا ؟ لە هەناوی حوزنی چرکەساتی بێزاری، تەرمێکی شەکەتم . هەنوکە وەنەوز بۆ عەشق ئەدەم، بەڵام ئیتر لە گەڵ خۆیشم هاوڕێ نیم ژوان فاروق که‌ریم
	Qadirzada.com © 2009. All rights reserved