لاپه‌ڕه‌یه‌ك له‌ خوێن

ستار ئه‌حمه‌د

 

ئه‌مه‌ منه‌تی گه‌ڵایه‌

به‌سه‌ر كراسی زریانه‌وه‌

باڵدارێك له‌په‌ری ئاوا ژیرده‌كاته‌وه‌

به‌ملپێچی به‌فره‌وه‌

به‌رد له‌زامی خاكا ده‌چێنێ

له‌لووله‌ی چه‌كا

ریشۆڵه‌كان به‌ئاگر هه‌ڵده‌سێنێ

چ غه‌درێكه‌

به‌هه‌نیه‌ی عه‌شقه‌وه‌ نووساوه‌

كچێنی له‌باخچه‌و

پیاوه‌تی له‌دوندی مه‌رگا

به‌كه‌ژاوه‌ی ته‌قه‌وه‌ گیرده‌كه‌ن

له‌نێوانی سونبوولی گوڵ و

له‌كوڵمی ئاوێكی ژیكه‌ڵه‌دا

ده‌ست بۆ كانییه‌ك ده‌به‌م

هه‌تا غوسڵی قه‌ڵه‌مێك ده‌ركه‌م

چۆن تیله‌ی به‌فرێك

له‌نمه‌ی بارانا بشۆمه‌وه‌

بۆ ئه‌وه‌ی بتوانم

لاپه‌ڕه‌یه‌ك له‌خوێن كاڵ بكه‌مه‌وه‌

ئه‌فسووس له‌مه‌یخانه‌ی شیعرا

وشه‌ سه‌ر ده‌بڕن و

ده‌یكه‌نه‌ مه‌زه‌ی ئه‌و ئه‌وینه‌ی

ختووكه‌ی عیشق ده‌داو

له‌مینبه‌ره‌كانا

ئانیشكی بڕاو ده‌كه‌نه‌ سه‌رین

ئێی زه‌مین

دووگیان ،به‌جه‌سته‌و ئێسك و

سه‌ره‌ڕۆی به‌ر شه‌پۆلی گڕخانه‌

بۆ وا ..؟ به‌سه‌ر عومری ده‌روازه‌یه‌كا

په‌رچه‌می نزاكان ده‌ڕنی

له‌كوێی ئه‌م جیهانه‌..؟

ده‌روونت به‌نیگا ده‌سپێری..؟

له‌كاسه‌ی كام چیادا

هۆن.. هۆن

فرمێسكی سوور ده‌ژمێری..؟

 

Qadirzada.com © 2009-2022. All rights reserved