| ||
|
||
یەكگرتوو لەسەر داگیرکردنی عەفرین بەیاننامەیەکی بڵاو کردەوە
ئەنجومەنی سیاسی یەكگرتووی ئیسلامی كوردستان لەسەر داگیركردنی عەفرین لەلایەن توركیاو سوپای ئازادەوە بەیاننامەیەكە بڵاوكردەوە.
دەقی بەیاننامەكە: بەیاننامەی ئیدانەی ڕوداوەكانی عەفرین لەلایەن ئەنجومەنی سیاسی یەكگرتووی ئیسلامی كوردستانەوە
بەناوی خودای بەخشندەی میهرەبان جەماوەری بەشەرەفی كوردستان.. هێزولایەنە سیاسیەكان..... كورد و كوردستانیانی جیهان......
بەداخەوە جارێكی دیكە لە مانگی ئازار دا گەلەكەمان لە عەفرین ڕوبەڕوی ئازار وناسۆریەكی دیكە بووەوە ، دوای دوو مانگ لە بەرگریی و ڕوبەڕوبونەوە دواجار بە پشت تێكردنی كۆمەڵگەی نێودەوڵەتی، ماف و ئیرادەی گەلەكەمان بووە قوربانی بەرژەوەندی زلهێزەكان، كوردانی عەفرین ڕوبەڕوی ئاوارەیی و دەربەدەریی و كوشت و بڕین بونەوە و بەشێك لە خاكەكەشمان لەلایەن سوپای توركیا و هەندێك لە چەكدارانی ئۆپۆزسیۆنی سوریاوە داگیركرا .
ئێمە لە یەكگرتوی ئیسلامی كوردستان، وێڕای هاوخەمی و هاوسۆزیمان بۆ كوردانی ڕۆژئاوا، ئیدانەی ئەم كارەساتە دەكەین كە بەرامبەر بە گەل و خاكمان ئەنجام دراوە ، داواكارین لە كۆمەڵگای نێودەوڵەتی بەرامبەر ئەم سیاسەتە دوژمنكاریەی كە دژ بە گەلەكەمان كراوە بێ دەنگ نەبێت، سنورێك بۆ ئەو جۆرە سیاسەتانە دابنێت و بە هانای گەلەكەمانەوە بێت و چارەسەرێكی سیاسیانە و ئینسانیی ئەو پرسە بكرێت.
ستەم لەهەركەسێكەوە بێت و لە ژێر هەر ناونیشانێكدا بێت ، بەرامبەر هەر كەسێك بكرێت، لەلایەن یەكگرتووی ئیسلامیەوە ڕەتكراوەیە و دژی دەوەستینەوە. جارێكی دیكە دوپاتی دەكەینەوە كە ڕوبەڕوبونەوەی ئەم جۆرە ڕوداوانە پێویستی بە یەكڕیزیی سەرجەم لایەنە كوردستانیەكانە. سەركەوتووبێت ئیرادەی گەلەكەمان...
ئەنجومەنی سیاسی یەكگرتووی ئیسلامیی كوردستان ١٩/٣/٢٠١٨
|
||
Qadirzada.com © 2018. All rights reserved
|
||